LOGORITMIKA MASHG‘ULOTLARINING MAKTABGACHA YOSHDAGI BOLALAR SALOMATLIGIGA TA’SIRI

Abstract

         Mazkur maqolada O‘zbekiston maktabgacha ta’lim tizimida logoritmika mashg‘ulotlarining maktabgacha yoshdagi bolalar salomatligiga ta’siri ilmiy-pedagogik jihatdan tahlil qilingan. Bugungi kunda Respublikamizda bolalarni jismonan sog‘lom, ma’nan barkamol va har tomonlama rivojlangan etib tarbiyalash davlat siyosatining ustuvor yo‘nalishlaridan biri hisoblanadi. Shu nuqtai nazardan, maktabgacha ta’lim tashkilotlarida innovatsion pedagogik texnologiyalarni qo‘llash, jumladan logoritmika mashg‘ulotlarini tashkil etish muhim ahamiyat kasb etadi. Maqolada logoritmika mashg‘ulotlarining nutq, musiqa va harakat uyg‘unligiga asoslangan metod sifatida bolalarning jismoniy, nutqiy va psixologik rivojlanishiga ijobiy ta’siri yoritilgan. Tadqiqot davomida logoritmik mashqlar bolalarda nafas olish faoliyati, harakat koordinatsiyasi, ritmni his qilish, chaqqonlik, muvozanatni saqlash va jismoniy faollikni rivojlantirishdagi samaradorligi tahlil qilindi. Shuningdek, ushbu mashg‘ulotlarning bolalarda diqqatni jamlash, emotsional holatni yaxshilash va ijtimoiy moslashuvni shakllantirishdagi ahamiyati ham o‘rganildi. O‘zbekiston Respublikasining “Maktabgacha ta’lim va tarbiya to‘g‘risida”gi Qonuni, “Ilk qadam” davlat o‘quv dasturi hamda maktabgacha ta’lim tizimini rivojlantirish konsepsiyalarida bolalarning sog‘lom rivojlanishini ta’minlashga alohida e’tibor qaratilgan. Shu asosda logoritmika mashg‘ulotlarini maktabgacha ta’lim tashkilotlari faoliyatiga joriy etish bolalarda sog‘lom turmush tarzini shakllantirish va jismoniy faollikni oshirishning samarali vositasi ekanligi asoslab berilgan. Tadqiqot natijalari logoritmika mashg‘ulotlaridan muntazam foydalanish bolalarning salomatligini mustahkamlash, jismoniy rivojlanishini yaxshilash hamda nutq va harakat faoliyatini uyg‘un rivojlantirishga ijobiy ta’sir ko‘rsatishini tasdiqladi. Shu sababli maktabgacha ta’lim tashkilotlarida logoritmika mashg‘ulotlarini keng qo‘llash sog‘lom va barkamol avlodni tarbiyalashning muhim omillaridan biri hisoblanadi.