KORPORATIV IJTIMOIY MAS’ULIYAT VA KORPORATIV MADANIYATNING O‘ZARO BOG‘LIQLIGI HAMDA UNI RIVOJLANTIRISH YO‘LLARI (INFINBANK AJ MISOLIDA)

Abstract

So‘nggi yillarda jahon va milliy iqtisodiyotda korporativ boshqaruvning zamonaviy yondashuvlari doirasida korporativ ijtimoiy mas’uliyat (CSR) va korporativ madaniyat tushunchalari alohida ahamiyat kasb etmoqda. Ayniqsa, bank sektorida ushbu ikki omilning uyg‘unlashuvi moliyaviy barqarorlikni ta’minlash, mijozlar ishonchini oshirish va uzoq muddatli rivojlanishga erishishda muhim rol o‘ynaydi. 2020–2025 yillar davomida O‘zbekiston bank tizimida olib borilgan islohotlar natijasida ushbu yo‘nalishlarga bo‘lgan e’tibor sezilarli darajada ortdi.Statistik ma’lumotlarga ko‘ra, O‘zbekiston Respublikasi Markaziy banki hisobotlari asosida 2020–2025 yillar oralig‘ida bank sektorining umumiy aktivlari 2 barobardan ortiq o‘sdi. Bu esa banklar faoliyatida faqat moliyaviy natijalar emas, balki ijtimoiy mas’uliyat, ekologik barqarorlik va korporativ boshqaruv standartlariga amal qilish zaruratini kuchaytirdi. Shu bilan birga, xalqaro tahliliy hisobotlar (jumladan, ESG yondashuvlariga oid materiallar) shuni ko‘rsatadiki, CSR siyosatini faol amalga oshirayotgan tashkilotlarda rentabellik darajasi o‘rtacha 15–20 foizga yuqori bo‘ladi.

Korporativ ijtimoiy mas’uliyat bu tashkilotning jamiyat oldidagi majburiyatlarini bajarishi, xodimlar farovonligini ta’minlashi, ekologik muammolarga befarq bo‘lmasligi hamda mijozlar manfaatlarini himoya qilishi bilan bog‘liq kompleks faoliyatdir. Korporativ madaniyat esa tashkilot ichidagi qadriyatlar, xulq-atvor normalari, boshqaruv uslubi va ish muhitini ifodalaydi. Ushbu ikki tushuncha o‘zaro chambarchas bog‘liq bo‘lib, korporativ madaniyat CSR siyosatining amalda qanday ishlashini belgilovchi asosiy omil hisoblanadi. Tadqiqotlar shuni ko‘rsatadiki, kuchli korporativ madaniyatga ega tashkilotlarda CSR loyihalari samaradorligi 30–40 foizga yuqori, xodimlarning ishga jalb etilish darajasi esa 20–25 foizga oshadi.