MAKTABGACHA TA’LIM YOSHIDAGI BOLALAR NUTQ BUZILISHLARINI LOGORITMIKA USULLARI ASOSIDA KORREKSIYALASH: ILMIY-NAZARIY VA AMALIY TAJRIBA ASOSIDA TAHLILI

Abstract

Annotatsiya. O‘zbekiston Respublikasida maktabgacha ta’lim tizimini rivojlantirish davlat siyosatining ustuvor yo‘nalishlaridan biri hisoblanadi. Ayniqsa, bolalarning nutqiy, psixik va ijtimoiy rivojlanishini ta’minlash masalalari dolzarb ahamiyat kasb etmoqda. Ushbu ilmiy maqolada maktabgacha ta’lim yoshidagi bolalarda uchraydigan nutq buzilishlarini logoritmika usullari asosida korreksiyalashning ilmiy-nazariy va amaliy jihatlari keng yoritilgan.  

Logoritmika nutq, musiqiy ritm va harakatning uzviy uyg‘unligiga asoslangan kompleks metod sifatida tahlil qilinib, uning logopedik amaliyotdagi o‘rni asoslab berilgan. Maqolada logoritmik mashg‘ulotlarning bolalar nutq apparati, fonematik eshituv, nutq ritmi va psixomotor rivojlanishiga ta’siri ilmiy manbalar hamda amaliy tajribalar asosida ochib berilgan. Shuningdek, maktabgacha ta’lim muassasalarida logoritmik mashg‘ulotlarni tashkil etish bosqichlari, metodlari va samaradorligi tahlil qilingan.

Tadqiqot natijalari logoritmika usullarining dislaliya, duduqlanish va umumiy nutq rivojlanmaganligi kabi nutq buzilishlarini bartaraf etishda yuqori samaradorlikka ega ekanini ko‘rsatadi. Ushbu maqola logopedlar, maktabgacha ta’lim pedagoglari va maxsus ta’lim mutaxassislari uchun amaliy ahamiyatga ega.