O‘LMAS UMARBEKOVNING “ODAM BO‘LISH QIYIN” ASARIDA INSONIY FAZILATLAR TALQINI

Abstract

 Annotatsiya:  Odam bo‘lish qiyin — O‘lmas Umarbekov tomonidan yaratilgan, 1969-yilda yozilgan roman bo‘lib, bir necha bor boshqa tillarga tarjima qilingan. Insoniylik, vijdon, halollik va ma’naviyat masalalari chuqur badiiy talqin etilgan. Muallif haqiqiy inson bo‘lish uchun faqat bilim va mansab emas, balki yuksak axloq ham muhim ekanini ta’kidlaydi.Romandagi Abdulla obrazi orqali ayrim kishilarning boylik va mansab yo‘lida o‘z va’dalarini unutishi keskin tanqid qilinadi.  Ushbu obraz vositasida insonning moddiy manfaat ortidan quvib, vijdoni hamda insoniy fazilatlarini yo‘qotib qo‘yishi yorqin ifodalangan.

  Shuningdek, asarda ota-onaga hurmat, inson qadr-qimmati, odamiylik tuyg‘ulari, yosh qalb kechinmalari hamda o‘zbek xalqiga xos soddalik va mehr-oqibat ta’sirchan tarzda aks ettirilgan. O‘spirinlarning orzu-intilishlari va hayotga bo‘lgan qarashlari ibratli voqealar orqali ochib beriladi. Har bir qahramonning o‘ziga xos xarakteri va ichki dunyosi mahorat bilan tasvirlangan bo‘lib, voqealar rivoji kitobxonda ularni go‘yo real hayotda sodir bo‘layotgandek taassurot uyg‘otadi.